【親子好去處】綠在深水埗

呀劍

呀劍常聽說朋友跟子女在假期出國旅遊而不留港,其實香港都有許多適合一家大細遊玩的地方, 不如參考《呀劍萬帥• 親子旅遊• 攝影扎記》打造你跟小朋友的一個親子旅程! 我不是甚麼旅遊達人,寫的也不夠全面,只希望跟大家分享一點點心得!

Facebook專頁:https://www.facebook.com/kimfamilytravel/
Blogger網誌:http://kimfamilytravel.blogspot.hk/

綠在區區已經發展到去深水埗區啦! 環保署繼綠在沙田、綠在元朗、綠在觀塘同埋綠在東區,終於綠在深水埗正式開幕啦!自問唔係一個 超級環保的人,只係有限度的環保,盡自己力量做到幾多得幾多。雖然係咁,但係我都會讓小朋友參與多些環保活動,都係影響幾多得幾多,盡咗力就得啦。

「綠在深水埗」位置就喺深水埗公園附近,沿通州街在西九龍走廊底下,行到去榮昌邨附近都會搵得到。同「綠在東區」一樣,這裡營辦團體都係保朗局。


真係唔Check番個官網都唔知,原來仲有其他區都陸陸續續進行工程當中,「綠在…」葵青、屯門 、大埔、離島都興建中。


仲有「綠在…」西貢、荃灣、灣仔、黃大仙,工程都規劃緊,仲有其他….多到數唔哂!


今日我哋嚟其實係參加咗個「麵包皮蘋果批工作坊」,在活動中心內進行,我哋一家同埋其他報咗名的家坊一齊學習學習。


活動中心內外都有好多二手衣物可以任放任揀

最正係有好多Game,只要5個乾淨玻璃樽就換到一隻,書都係一個樽就換到。

鏡頭一轉義工導師已經講解完畢,呀哥同呀芊開工啦,呀哥先刨蘋果,呀芊就打雞蛋!


呀芊敲打雞蛋掂到蛋白,忍唔住嗌「咦!好核突」!我心諗咁你日日食緊核突嘢囉。


點解呀哥刨到個蘋果好似生癩痢咁㗎!


打勻好雞蛋後終於唔覺核突可以影番張相。


步驟我都唔係好記得…應該係落咗D肉桂粉同咩咩粉炒一炒。忙住影相拍片都唔記得哂,不過Miss都有俾我哋「碌屎」。(你哋想學睇Youtube大把)


將蘋果切粒後就可以落鑊炒一炒,炒到收乾水。


好啦!好啦!主角出場啦,就係過咗少少期的麵包,總之未見佢發霉就仲食得。哥哥先將好多塊麵包皮切條。


然後將切好麵包條沾上蛋漿…再放入焗爐 (點解寫寫下變咗寫食譜>.<)


唔講啦唔講啦,自己睇… (其實驚講D唔講D教錯大家,始終唔係專家,識食唔識煮)

過咗唔知幾耐,大功告成啦!


粗重功夫梗係男人來!


雖然唔算得上好好食,不過第一次整都算咁上下,我覺得最主要係唔好俾蘋果太濕,要炒乾少少,咁焗出嚟的麵包皮就會更加脆。


呀芊你打蛋後好似冇咩貢獻囉喎…^>^


完成後食咗幾件,跟手走出去行下,呢度空間好大,人又少,都好舒服。


對出已經有四張好Colorful的長櫈吸晴,原來上面都分別畫咗深水埗最有特色的地標


這張係西九龍中心喔,仲有幾隻字「購物 需要 想要」好應景,唔單止記錄咗深水埗特色,仲帶出環保信息,叫人買嘢前三思。


玩具街…惜物分享,其實好似暗諷深水埗係一個挺物質化的巿區,哈哈~


咁多個綠在區區,第一次見呢個回收組合箱,集齊慳電膽、充電池、膠樽、玻璃樽及廢電子產品。


旁邊仲有個小草地可以俾小朋友喺上面跑一跑,不過剛好正準備活動。


所有由回收卡板搭建的玩樂設施,都造得極靚!唔玩得都打得…打卡呀!


大家有時間都帶小朋友嚟參觀下,同埋參加下佢哋每月定期嘅環保工作坊啦!我哋已經Mark實下次參加個班,如果撞到我記住出聲喎,我好親民㗎…平時!

Photo by CANON 5D Mark IV, Len | EF 16-35mm f/2.8L USM


想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

呀劍評分: 8分

呀劍評語: 可以閒來悠閒一下,又可以帶環保意識給小朋友,確實一個唔錯嘅地方,同平時去玩嘅地方唔同,參加者都係街坊街里,跟公公婆婆一齊學造蘋果批,真係幾Warm幾好玩。

綠在深水埗 簡介

環境局發表《香港資源循環藍圖 2013 – 2022》中,提出全港市民必須合力實踐「惜物、減廢」的環保新文化,共同珍惜地球資源,讓綠色生活紥根社區,以應對當前的廢物管理問題。為此,政府將在全港 18 區設點(前稱「社區環保站」),資助非牟利團體營辦,透過環保教育加強推廣,同時為更多市民投入減廢回收活動而提供所需的支援。
而「綠在深水」便是其中之一。環境保護署經過公開招標後,現由保良局營辦。

「綠在深水」主要功能:
(i) 推行環保教育: 為社區內不同階層、背景的深水埗居民,提供多元化的環保教育活動,從不同角度將綠色生活文化注入社區。並藉連結深水埗居民,成為環保義工,攜手打造綠色深水埗。

(ii) 支援地區減廢回收工作: 提供回收車,到深水埗各屋苑收集可回收物料供本地進行循環再造,讓市民可親身參與回收減廢活動和推行其他源頭分類的措施等。歡迎屋苑、團體聯絡回收安排。

「綠在深水埗」恆常回收種類:
1. 乾淨玻璃樽
2. 電器、電腦、電腦相關配件(不論好壞)
3.充電池、慳電膽、光管
4. 乾淨塑膠樽、金屬、廢紙

「綠在深水埗」按季度回收種類(請事前致電了解回收期限):
1. 二手衣服、鞋、袋
(床單、被舖、睡衣、內衣褲等個人貼身用品 除外)
2. 日常用品
3. 廚具用品
4. CD /VCD /DVD
5. 書藉 (教科書除外)

歡迎深水埗各屋苑、機構、學校參加「綠在深水埗」的回收支援服務及環保教育活動。


地址

深水埗通州街339號


開放時間

0800-2000(一至日) 


辦公室服務時間/惜物有禮回收獎勵計劃服務時間/環保教育報名時間

0800-1800(二至日) 


回收服務時間

0800 – 2000(一至日)


網址

https://www.wastereduction.gov.hk/tc/community/cgs_intro.htm


專頁

綠在深水埗 Sham Shui Po Community Green Station


查詢

2522 4388

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com