【親子好去處】生命教育農莊 Life Education Farm (Part 2)

呀劍

呀劍常聽說朋友跟子女在假期出國旅遊而不留港,其實香港都有許多適合一家大細遊玩的地方, 不如參考《呀劍萬帥• 親子旅遊• 攝影扎記》打造你跟小朋友的一個親子旅程! 我不是甚麼旅遊達人,寫的也不夠全面,只希望跟大家分享一點點心得!

Facebook專頁:https://www.facebook.com/kimfamilytravel/
Blogger網誌:http://kimfamilytravel.blogspot.hk/

去到農莊除咗耕田插秧之外,點少得同動物玩遊戲呀!不過數量咁多,同埋有唔同種類,仲好有特色嘅動物,真係只有「生命教育農莊」至有!(我最鍾意呢隻松鼠仔,俾個大頭你啦)

上回提要,上午體驗過田園種植,然後食過超抵食又好味嘅 Lunch,再嚟DIY柴火砵仔糕之後,休息咗陣就繼續我哋下午嘅行程啦!

占士哥哥用咗個好特別嘅方式同我哋幾個家庭分組,佢將兩塊樹葉剪開分成4段,派俾每一個家庭,然後由小朋友去搵番樹葉嘅其他部份,直至砌回原來樹葉的樣子,就順理成章分埋組!


前段占士哥哥帶我哋去參觀各樣植物及蔬菜,後段則由Sunny哥哥帶我哋去參觀日行/夜行動物

占士哥哥喺菜田度摘咗D苦瓜嘅葉俾大家聞一聞試一試,小朋友都真的勇敢將苦瓜葉放入口食,有一陣苦苦澀澀的味道

來到羊棚,小朋友再一次餵小羊,今次占士哥哥放埋其中一隻羊出嚟,唔駛隔住個鐵絲網咁餵佢哋

呢個芊芊又要餵又要驚…當小羊走埋去佢包菜度,呀芊即刻笑住咁嗌,又要走開又想行埋去餵,真係好攪笑!


都係縛住佢容易餵D,哈哈~

其實羊係唔知飽,所以餵得差唔多好收手啦!

然後我哋慢慢的欣賞其他蔬菜及花朵


其實我覺得懂得種植的人真係幾吸引

池塘裡仲有好多鯉魚BB

途中仲見到黃猄蟻,估唔到佢連咁大棵的香蕉樹葉,都可以黏埋一齊成為自己的蟻巢

好啦,各位觀眾!動物導賞即將開始啦…先參觀「夜行動物館」,見到館外的相已經夠哂吸引,想像得到一陣間小朋友見到咁多動物,一定叫到「嘩!嘩!咁聲」

佢哋叫咩名我唔逐一介紹,同埋我都唔係好記得,但係真係好新奇爆趣囉!


越睇越覺得佢個樣好似Keroro軍曹

咁大隻橙色(褐色)蛙蛙,芊芊見到超興奮呀!

真真正正的龍貓呀!

呢隻究竟係蛇定係蚚蜴,見到佢個樣知佢超懶


可愛到震嘅鼠鼠!


我工人姐姐最驚的蛇,就連提一提「蛇」呢個字,佢都頂唔順

毛鬙鬙蜘蛛…好驚呀!不過 Sunny哥哥話呢度基本上所有夜行動物都係無毒

呢個刺蝟真係好似一舊糯米糍

仲有佢…再一次見面,我每次見到呢隻兔仔,就諗起羅家英戴假髮(達文西)

估唔到呢度都會見到「雪山飛狐」!

夜行館最後壓軸出場的就係呢隻猫頭鷹,佢好緊張好易嚇親,仲會一直咁望住你,所以大家千祈要叫小朋友參觀時安靜點,如果唔係會容易嚇死佢哋!

離開「夜行動物館」,就有兩隻小豬歡迎我,乜我對鞋好臭咩…定係當咗佢哋係食物


喂!想點…我去到邊佢哋就跟到邊


可能佢哋真係夠鐘開餐

我其實差D就想摸下佢哋個鼻,呢兩隻寶貝小豬嘜,真係好可愛!

小豬嘜隔離就有兩個大玻璃櫃,原來裡面養住好多隻罕見蚚蜴及變色龍

呢隻湖水藍真係好靚呀!個樣仲好型、英、帥。

相反呢隻好有霸氣,如果要將佢哋分角色的話,呢隻應該係大佬!

其實今次哥哥都影得一手靚相,好似下面呢張就係由佢影,哥哥捕捉到的角度及表情,都不在我以下!


繼續參觀雀鳥類 ,鸚鵡、火雞、大咀鳥等當然唔少得


但係最吸引我係呢隻超得意的松鼠仔!佢自己一隻住在一個大籠裡面跑跑跳跳


佢爬嚟爬去走得超快,要影到佢真係唔容易


停落嚟飲水嘅這2秒,終於捕捉得到!

下面呢張又係哥哥傑作,番到屋企睇相時,我見到呢張都拍爛手掌讚靚!

我哋希望下次再嚟可以有機會再見到呢位松鼠先生


然後兩兄妹見到有隻八哥,就開始同佢傾起計上嚟,隻八哥真係識得講「Hello」㗎!


其他色彩超美的鸚鵡

Sunny哥哥話一般鸚鵡的壽命都有20-30年,唔知佢又幾多歲呢?

就連老婆都愛上咗呢隻鸚鵡同佢玩起上嚟!

最後我哋去到睇綠頭鴨同埋孔雀

佢哋兩個仲摘咗好多檸檬葉去餵孔雀,個個小朋友都攰到番去休息,呢兩個細路好似有無限咁多電咁

今日實在玩得太充實,我哋將要離開前,番去品嚐番大家自製的砵仔糕,用電子蒸煮的當然水份飽滿D,咬落比較黏韌同彈牙

由柴火蒸煮出來的就比較有點兒乾身(表面都裂開哂),但係食落就好重柴香味!

剛好臨走前來個小茶點!將整個旅程劃上完滿句號

今次呀劍萬帥旅行團成功完成整個行程,如果讀者閣下有興趣又唔怕中伏跟我周圍去玩,可以到文末的連結,登記成為我們一分子,下次有活動一定預埋你!

Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

呀劍評分: 10分

呀劍評語: 農場去得多,不過今次這個難得一遇的體驗實在超難忘,除咗有各樣農耕體驗及砵仔糕傳統柴火製作外,最特別係可以一次過見到咁多少見,甚至從未見過的動物!老土D講「真係一次過滿足哂3個願望呀!」

生命教育農莊 簡介

我們是一個以弘揚生命教育為宗旨的非牟利團體,協會由一批有志推動全人教育和愛護生命的熱心人士組成,匯集社會上對生命教育的資訊及動向,並透過保育農莊提供實質的教育課程和活動,宣傳愛護和理解自然的概念,傳遞人和自然和諧共處的理念。

時間

10:00 – 16:00 (自行預約及計劃行程)


其他預約活動

盆栽種植、玻璃樽彩繪、中藥園導賞、艾草蚊香DIY工作坊、木鎖匙扣DIY工作坊、環保紙製作


地點

元朗八鄉馬鞍崗村

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com