【親子好去處】綠匯學苑 低碳生活館 Green Hub

呀劍

呀劍常聽說朋友跟子女在假期出國旅遊而不留港,其實香港都有許多適合一家大細遊玩的地方, 不如參考《呀劍萬帥• 親子旅遊• 攝影扎記》打造你跟小朋友的一個親子旅程! 我不是甚麼旅遊達人,寫的也不夠全面,只希望跟大家分享一點點心得!

Facebook專頁:https://www.facebook.com/kimfamilytravel/
Blogger網誌:http://kimfamilytravel.blogspot.hk/

出發前幾日一路同哥哥講今日要帶佢去坐監,因為佢平時太唔聽話,所以要罰佢!妹妹就好開心咁話「好嘢~可以去坐監lu…」(其實佢知唔知咩叫坐監呢) 我哋其實係去綠匯學苑,之前都講咗好耐,但今日終於有機會去

到咗大埔墟火車站A2出口,沿住有蓋長廊行一小段就會見到右手邊有條行人隧道,穿過火車站底會到達運頭角遊樂場。

穿過遊樂場再步行回至運頭角里,慢慢就會見到靠左手邊就係綠匯學苑

我先前在網上報名參與導賞活動,所以我哋11:00就抵達,先在接待處登記掛上導賞團名牌,就隨即開始導賞活動。整個導賞只係一小時內完成,有職員從旁介紹去認識一下這個一級歷史古跡「前身大埔舊警署」都不錯呀!

大家排排坐先聽導賞員講解幾分鐘的歷史背景,原來前身這座大埔舊警署,係發展局選定嘉道理農場暨植物園為合作伙伴,藉第二期「活化歷史建築伙伴計劃」(簡稱「活化計劃」)將該歷史建築群活化成「綠匯學苑」

最首要介紹的係呢棵老榕樹,相信佢係跨越時代由大埔舊警署到依家,佢哋手只有一舊照片,所以都未能推斷出呢棵樹嘅真實年齡,但都估有幾百年歷史。

這苑裡都有好多不同藝術品,其中一個在這老榕樹下的是這個"聆聽大自然"主題的木大耳朵,入到嚟嘅每一位朋友並唔係要匆匆忙忙咁到此一遊,而係要去細心觀察聆聽去享受大自然,簡單嚟講即係叫大家「慢活」。

喺周圍附近仲可以搵到其他木製的小動物

呢支幹係咩嚟㗎呢?其實喺當年的大埔舊警署係用嚟升旗的地方

嘩!呢度有蜜峰巢,係咪真㗎!好驚呀…

哥哥都係冇心機聽講解…

整個館雖然唔算大,但係我入到嚟都有一種好寧靜好舒服嘅感覺

導賞員特別介紹建築物屋頂的瓦片,重複又重複,對這被活化後的屋頂好驕傲,知道他們在活化過程中盡量保留了昔日的一磚一瓦,對住古老舊建築真係唔多唔少都有D感動

去到戲肉啦!就係到前身警局今天係活化後的展覽館

牆上的圖案都畫得好靚

導賞員又再一次叫我哋望下屋頂上的磚瓦,其實又真係修箿得好靚,唔怪得之佢咁Hard Sell

兩個小朋友扮吓警察查案先,枱上的電話枱燈都保存得好好

仲有幾張舊相,唔知係咪雷洛年代呢?!

呢個收音機真係一D都唔似舊嘢喎,仲可以播到聲tim! 我好想要呀

去到槍械房好緊張呀!唔知會唔會有好多槍拎上手呢?

點知原來只係得兩大塊展板,介紹下歷史咁!

冇槍拎住就唯有扮吓嘢啦,唔覺唔覺都幾似呀!

參觀完槍械房就可以過隔離監房,呀妹即刻話好嘢!有得坐監lu~

哥哥「好嘢!我坐監啦」

我「恭喜哂!」

我哋嚟探監啦…(入咗戲的我) 越扮就越開心

哥哥神情交足戲!

俾番個大特寫哥哥先….

「誰人逼我。。。」

「屈我辱我。。。」

「早慣面對災禍」放監lu…

入多一重鐵閘又扮多一次坐監…

但係呀芊你仍然係咁開心,真係攪笑~

倉裡面有兩個「臭格」,導賞員話呢個係以前用嘅述語,因為個每倉裡面連埋厠所一齊,所以特別臭!

裡面有兩塊黑板仔,呢個媽咪要佢哋寫上罪名影番張入冊相,如果係婆婆喺度一定話「才!乜影埋D咁嘅相,大吉利是!」

呀妹乖D,諗唔到有咩罪名俾佢!不過我依家諗到啦,係「太可愛!」

再過隔離間房見到大埔墟的地圖,介紹大埔村民的農業生活,仲有個公秤同幾款唔同既電話及木櫈

經過一道門我哋可以去到宿舍參觀,平時呢個地方只有預訂住宿及參加導賞的朋友可進入(當然我哋也只可以在這個亭園參觀而已,希望將來有機會到此住番一晚)

屋頂上的煙囱都保留到原始特色

導賞員特別介紹這個雙層屋企的特色,可以有助隔熱,在夏天時侯可以讓屋內的人更涼快,可以達到冬暖夏涼的狀態。

另外館內都有農夫細心打理一塊小小的農地

館內有好幾個工作坊,如果想參與某些指定的活動,就要事先上網睇睇每週的活動時間表

我哋揀咗個植物拓染工作坊,只係每位$10,又可以俾小朋友一個小活動,沒有時間限制,坐低就隨時開始

 
大功告成!
 

之後我哋就再繼續去整再造紙,呢個過程就快好多,因為職員已經預先準備好所有材料

芊芊製造的再造紙誕生啦!不過仲要拎出去風乾

館內其他地方的藝術品,如果發起一個尋寶遊戲同小朋友一齊鬥快搵齊所有藝術品都幾好玩

另外題外話,館內都有嬰兒間連傷殘洗手間

其實喺綠匯學苑門口都攞放咗幾個攤檔,都係一些手作飾品及手工肥皂等

喺附近又俾我哋發現到剛才歷史介紹的古井

呢度某部份的電力供應都係來自館內的太陽能收集器,晚上這些燈柱就會利用太陽能來發電。燈炷上做埋路標,果然夠哂環保!

草園中的木板櫈,原來係地下大水缸的出入口

館內仲有個互助店,售賣一些有機產品、書籍、精品及用品等,有D係即日運送過來的農作物,非常新鮮㗎!

互助店裡面有呢個打卡位,可以同呢個蔬果人影番張相

講咗咁耐係時侯醫肚啦!在館內有這家「慧食堂」,大家可以喺度享用午餐,當然食嘅都係低碳食品!(呢度周不時仲有烹飪課程,大家可以留意官網詳細資料)

「慧食堂」裡面的佈置都好靚好有特色

餐單好簡單,分為4合1或3合1餐,每份食品以$30計,另外甜點及飲品都係分開落單

店員仲會進餐期間介紹一下低碳食材及烹調方法

到我哋開餐啦!

老實講,一定唔夠你食街邊嘢好食㗎啦,而小朋友都確實唔鍾意食,不過健康嘢食係咁㗎啦,大家唔介意一餐半餐都可以試下。哥哥都好乖食得乾乾淨淨

呀芊就…

食飽飽後要自己執拾餐具!對小朋友嚟講都係一個好好的習慣,我喺屋企都有要佢哋幫手㗎!

最後我哋又番去接待處走走影影相就離開啦

在館外的對面原來舊時係「舊北區理民府」

北區理民府係英國租借新界後興建的首幢民政大樓。於1981年11月13日被列入香港法定古蹟,1988年至2000年撥作環境保護署大埔區分處,2002年成為香港童軍總會新界東地域總部,並命名為羅定邦童軍中心。

雖然唔可以進入,但係在中心外圍已經係影相景點啦!呢條長長又古老的走廊,超正呀

我哋喺呢度足足互影咗十幾廿分鐘,突然為這旅程加上一段Catwalk Show

芊芊擺出呢個甫士,證明佢覺得自己嗰刻好認真對待呢張相,因為佢平時係唔會攞出呢個終極甫士

喂大佬,影影下突然…NG!!!

芊芊即時抽水扮哥哥頭先打乞嚏

Photo by CANON 5D Mark III, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分

呀劍評語: 一個很值得一到的地方,雖然地方細細,但係在這裡悠閒過大半天,覺得整天都多少幾個小時一樣。香港人匆匆忙忙,真係要好好學習一下慢活,而且更要嚮應低碳生活!

綠匯學苑 簡介

舊大埔警署位處於大埔運頭角一個的小山丘上,是新界首間永久警署,其所在地是殖民地政府在1899年接管新界時舉行升旗典禮的地點。鑑於大埔被殖民地政府視為新界中心,大埔因而成為新界的行政總部。

直至1949年,舊大埔警署一直被用作新界警察總部。其後舊大埔警署曾用作為分區警署、新界北總區防止罪案組辦事處等不同警務。直到1987年,新的大埔分區警署啟用後,舊大埔警署始停止運作。

舊大埔警署於2009年獲古物諮詢委員會評為一級歷史建築。

2010年9月16日,發展局選定嘉道理農場暨植物園為合作伙伴,藉第二期「活化歷史建築伙伴計劃」(簡稱「活化計劃」)將該歷史建築群活化成「綠匯學苑」,以推廣永續生活。

在活化工程上,嘉道理農場暨植物園採納了綜合策略,保育舊大埔警署的歷史、建築及生態價值。

日後綠匯學苑將提供多元化的啓迪教育及低碳生活項目,促進公眾及團體了解更具永續性的生活模式,積極回應氣候變化及資源枯竭等問題。

綠匯學苑已於2015年8月啓用。


訪客中心

上午十時至下午五時

文物展覽及文物徑

上午十時至下午五時

星期二及特定日子*休館

慧食堂

上午十時至下午四時

特定日子*休息

社區互助商店

上午十時至下午五時

特定日子*休息

地址

香港 新界 大埔 運頭角里 11 號

免費入場


導賞服務 

(一) 一般參觀 

綠匯學苑的各項設施均設人數上限。欲免向隅,我們建議公眾在到訪綠匯學苑前先作預約。訪客人數達五人或以上的團體必須預約。最後登記入場時間為每日下午四時。

(二) 綠匯學苑(舊大埔警署)免費古蹟導賞服務 

每天兩團(星期二及特定日子*除外) 

上午團:上午十一時至中午十二時 

下午團:下午二時至下午三時 

語言:粵語(英語或普通話團可在報名時要求安排)。 

必需預先報名


查詢電話

2996 2800

電郵

greenhub@kfbg.org


(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk