【親子餐廳】堅尼地城 Butcher and Baker Cafe

呀劍

呀劍常聽說朋友跟子女在假期出國旅遊而不留港,其實香港都有許多適合一家大細遊玩的地方, 不如參考《呀劍萬帥• 親子旅遊• 攝影扎記》打造你跟小朋友的一個親子旅程! 我不是甚麼旅遊達人,寫的也不夠全面,只希望跟大家分享一點點心得!

Facebook專頁:https://www.facebook.com/kimfamilytravel/
Blogger網誌:http://kimfamilytravel.blogspot.hk/

親子餐廳你去過邊幾間?但係食物質素同遊玩場地同樣兼顧到的又有邊幾間?呢個Butcher and Baker Cafe實在值得推介給大家!

我哋今日搭港鐵第一次踏足堅尼地城站,我同媽咪都好鍾意呢隻色呀!😍


佢哋兩個真係好可愛,走去車頭前同港鐵講拜拜!有陣時又激死人,但係有陣真係覺得佢哋好天真


喺C出口步行大約5分鐘就到㗎啦!有咗港鐵站真係超方便

出站後沿左手方向一直行,旁邊石牆全係樹根!樹嘅生命力真係超強


行到科士街同西環邨轉角就是了

門外都擺設得好靚好有特色,一架舊單車縛住一束汽球

星期日的下午特別多人,幾乎一個位置也沒有,大家記住要預先訂枱,如果唔係可能都要等好耐。

一入到餐廳就見到這兩個盆,一個裝着Kids Free Lucky Draw,一個裝着朱古力,全係免費任攞,真係心心眼都彈咗出嚟!當然我哋要保持住禮儀,Lucky Draw唔中就唔再抽留機會俾其他朋友,朱古力都少食所以冇拎…好多!

相信Lucky Draw都係些小禮物逗小朋友開心

餐廳有好多外國家庭,不過再晏少少開始多香港人,可能香港真係習慣晏起身…哈!

門口呢個水吧真係好正,即刻幻想自己喺度工作都特別型仔

餐廳環境十分大,中間有個整Pizza嘅大爐灶同埋Bakery嘅地方

呢個爐燒出嚟嘅Pizza一定超好味,未食口水都開始流出嚟


所有侍應都好好禮貌,服務態度超好。起初嚟到呢種咁多外國人嘅地方,以為實會大細超唔點招呼我哋


再行到裡面有其他座位,真係可以食得好舒服好Relax


呢兩張沙灘椅真係爽,真係三五知己食完嘢可以過嚟坐低密密斟

最裡面向門口方向影番出嚟嘅角度,另外原來最裡面呢度就係兒童遊玩區

所以都未坐定,哥哥就一支箭跑咗入去

雖然話係親子餐廳,不過供小朋友玩嘅地方,老實講一點都不大,一個平台有舵手扮船長同埋旁邊放着一張乒乓波枱,但又確實已經好足夠小朋友玩喎

佢哋兩個自己想着想着,自創好多攪笑遊戲俾自己玩,所以話其實好多時都只係大人覺得小朋友唔夠玩,其實即使一張紙、一個筆可能佢哋都已經好滿足

舵手區那邊地上仲有兩個小洞盛載着好多波波,係一個超迷你波波池,即使咁細個㝫都係可以照樣捐入去,問你怕未!

玩飽之後終於肯過番嚟乖乖坐低食嘢,我哋張枱對住個超大電視,佢哋專心睇,我同媽咪就可以慢慢揀點餐啦!

BBQ Chix Tacos $135

入口好香滑帶丁點辣, 滑係因為餅上的水牛芝士, 比較適合大人食

Hippy Italian Pizza $140

蝦好大隻好爽口新鮮, 茄汁帶點酸好開胃, 好重鮮茄味!

$Spaghetti Marinara $150

Pizza有點似Pizza乞, 冇咩特別但都算係好味道


如果親子餐廳係一條Formula,(食物質素+遊樂設施=10分),可能以前去嘅親子餐廳都係比較着重遊樂設施,可能算式係咁(2+8=10分),但係Butcher and Baker Cafe,我會俾(7+3=10分)


老實講玩的地方不大也不多,但係我認為親子餐廳始終要以食物為主,再者這地方細細卻已經足夠兩伙子玩極唔走,所以 We’ll be back!

食完嘢帶住佢哋周圍行,經過㕑房去到Bakery


餐廳內的Bakery部份食物全係免費任食, Cookie, Cupcake, 牛角包, 朱古力迷你cupcake都係任你拎

好開心呀,食完大餐仲有飯後茶點…都不特止

呢度最大特色都唔係親子遊玩區,反而係呢個Kids Kitchen,只要入嚟用餐,呢個兒童㕑房專區,大人細路都可以過嚟任夾任食

有爆谷、冬甩、橡皮糖、啫喱糖,仲有軟雪糕食!嘩,無聽錯係雪糕任食呀!仲有Cone㗎!

雪糕有3款,你梗係以為有士多啤梨,雲呢拿同埋朱古力,顏色你就估中,但原來佢哋係一樣味道,只係落咗唔同食物色質做出唔同顏色!不過點都好,唔駛錢任食,咩味都冇所謂!

喺Kids Kitchen隔離仲有兩大支氫氣,職員如果有時間就會免費送小朋友Balloon㗎啦!實行贏咗小朋友個心等你唔幫襯唔得

今日真係大解放,攞正牌食糖果雪糕Buffet

最後待應姐姐見到佢哋兩個仲每人送咗個卡娃耳小Cup Cake㖭!個衰妹剩係食咗上面個幾粒m&m!


來來回回食完又玩,玩完再食!今個晏晝真係開心到不得了,大人都食得開心又滿意,差唔多日落西山我哋先番歸!

呢個哥哥成日都「蝦」呀妹,但係又真係幾攪笑嘅!

最後Bonus Track介紹一下廁所,因為裡面都好有特色㗎,哈哈!

我哋搭番港鐵離開堅尼地城啦!今日嚟嘅呢間Butcher and Baker Cafe真係好貼地呀!

Photo by CANON 5D Mark IV, Len | EF 24-70mm f2.8L II USM

呀劍評分: 10分

呀劍評語: 親子餐廳好食嘅冇幾多間,雖然佢俾小朋友玩嘅空間並非真係好大好好玩,但係對小朋友嚟講都已經玩得夠開心,始終親子餐廳都應該係嘢食先係主打!


營業時間

星期一至日: 07:00-23:00

地址

西環堅尼地城加多近街57-59號安發大廈地舖


交通

港鐵堅尼地城站 C 出口, 步行約4分鐘


電話

2591 0318


(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk