【親子好去處】黃泥涌水塘花園 划艇公園 水上單車

呀劍

呀劍常聽說朋友跟子女在假期出國旅遊而不留港,其實香港都有許多適合一家大細遊玩的地方, 不如參考《呀劍萬帥• 親子旅遊• 攝影扎記》打造你跟小朋友的一個親子旅程! 我不是甚麼旅遊達人,寫的也不夠全面,只希望跟大家分享一點點心得!

Facebook專頁:https://www.facebook.com/kimfamilytravel/
Blogger網誌:http://kimfamilytravel.blogspot.hk/

風繼續吹…~真係好舒服好寫意呀,我話過一定要再番嚟呢度玩,黃泥涌水塘 i ♥ u

黃泥涌~呢個地方大家都聽過個名,但係問你其實係邊度,可能大家都答唔出!其實大家只要在中環交易廣場搭6號巴士或者在銅記搭5號專線小巴就會到

其實就係陽明山莊前一段路就會見到,呢度係香港唯一一個划艇公園

入口已經設有洗手間及小賣部(其實在水塘附近都有一個),所以大家嚟到唔怕會餓親,可以隨時隨地買到嘢食!


這個小賣部賣嘅都係腿蛋麵、三文治等小食,仲有鹵水雞脾雞翼蛋同埋好特別的有西多士,真係即叫即炸俾你!

仲有好正好正嘅居然有啤酒賣,分別係喜力同生力罐裝啤酒,價錢真係唔算貴!

沿住扶手樓梯行落一層可以望到整個水塘靚景!

再落多層就到地面水塘邊位置,其實呢度有部汽水機,如果你喺小賣部買可樂就傻仔了!


湖邊都設有另一小食亭

亦設有幾枱供人休息食吓嘢!


呢度賣嘅嘢都係差唔多(應該其實兩邊都係同一老闆),不過呢度唯一唔同就係多咗雪條雪糕

我哋未划艇之前先醫飽個肚食少少嘢先,媽咪去咗買嘢食,佢哋兩個嘢就喺度包剪揼

新鮮腿蛋治+汽水!再望住呢個靚景真係好爽!


雖然已入秋,不過今日都係有D曬


記住要划艇先要嚟到樓梯口附近的售票處買飛,如果假日人多的話,職員會俾張飛你寫上時間,大概30-45分鐘內,再番去報到上船!


我哋兩大兩細,就揀咗架四座位水上單車,今日星期日就承惠$140,可以划一個鐘頭!


原來呢度除咗划艇仲可以玩搖控模型船!仲有咁多款型號俾人揀…不過要擺低$500按金,租就每小時$50


如果大家買咗飛又未夠鐘,可以沿呢條斜路行去水壩欣賞湖景


沿住斜路行上去會出番去大潭道,跟住轉左繼續向水壩方向行


今次呢個水壩建於1899年…

好嘢要講三次,「真係好舒服好靚呀!」

再向下走就出番馬路或沿住山路一直行

欣賞完水塘景就可以沿途折回,去番水塘邊準備上船


落樓梯行到上浮台,將飛交俾叔叔!


大叔會按記低每一隻艇出去的時間,若夠鐘就會用大聲公叫番艇編號泊番岸!如果大家想偷雞玩多陣,可以去到好遠等聽到大聲公話夠鐘,先至踩番過上岸(因為要踩番過嚟都要一段時間)

終於上咗艇lu…嚟番張合照紀念吓先!話說我哋好大鄉里,有事冇事都會拍照留念


大家唔好以為好易踩,因為風大,所以踩嚟踩去都係原位…幾經辛苦先至踩到出去離岸不遠嘅地方


踩吓踩吓原來又冇咩嘢做,跟住隔離艇一位好心叔叔分享咗少少方飽俾我哋,俾小朋友掉方飽落水塘餵吓魚

塘裡大魚細魚都有!兩個餵得好開心


話咁快,開心嘅時光過得特別快…又係時侯講拜拜,我哋好唔捨得咁泊番埋岸,我話過下年一定要再嚟多次!$140 四個人玩1粒鐘都幾抵呀!

踩完之後冇哂力,一於再上去小賣部食少少嘢!睇住老闆娘即做西多士,真係口水都流埋!熱辣辣真係好好食!WE’LL BE BACK

Photo by CANON 5D Mark IV, Len | EF 24-70mm f2.8L II USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分

呀劍評語: 踩水上單車,你可能只會諗起西貢康樂戶外水上中心或者迪欣湖,其實近近哋香港都有呢個黃泥涌水塘!一於假日同埋一家大細嚟玩吓

地點

香港黃泥涌大潭水塘道


設施

遊樂小艇出租亭 


配套設施 

花園內設有洗手間、小食食肆及小食亭 


開放時間

每年五月至九月:上午9時至晚上7時 

每年十月至翌年四月:上午9時至晚上6時


查詢電話

2555 0103

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : kimfamilytravel.blogspot.hk